PARLEMU TRA NOI LIVRET

U dispusitivu accademicu di l’insignamentu di a lingua corsa prevede, à u minimu, trè ore d’amparera di a lingua corsa qualsiasi u livellu di scularizazione. U cusì dettu « insignamentu di e trè ore » deve custruisce un ammaestramentu diffusu di a lingua corsa è necessiteghja un sapè fà prufessiunale specificu. Stu sapè fà, Mariantonia Salini l’hà custruitu à u filu di u so parcorsu di furmatrice à prò di l’insignamentu di a lingua corsa, ch’ellu sia in u quadru bislinguu o dettu « standard ». È ghjè cusì ch’ella ci invita oghje à parlà trà noi, à partesi da situazione simplice di a vita cutidiana in cumpagnia di Vulpucciu è a so famiglia. L’andatura hè chjara : prupone à i sculari di sviluppà cumpetenze di cumunicazione è di spressione trà elli incù un staccamentu prugressivu di u maestru ch’averà messu in anda arnesi da aduprà di modu autonomu. Di più ch’un metodu, Parlemu trà noi hè una dimarchja pedagogica chì si pò impiegà è accumudà in parechji duminii. Ch’elli ne fessinu usu i maestri senza vezzulà ! È cusì sia !